ວັນທີ່ 05-13 ທັນວາ 2024 ທີ່ຜ່ານມາ, ໂຄງການຄຸ້ມຄອງຊັບພະຍາກອນນ້ຳແບບເຊື່ອມສານ ແລະ ການປັບຕົວບົນພື້ນຖານລະບົບນິເວດໃນອ່າງຮັບນ້ຳເຊບັ້ງຫຽງ ແລະ ຕົວເມືອງຫລວງພະບາງ (IWRM-EbA Project) ພາຍໃຕ້ອົງການສະຫະປະຊາຊາດເພື່ອການພັດທະນາແຫ່ງ ສປປລາວ ແລະ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ຄູ່ຮ່ວມມື ໄດ້ຈັດກອງປະຊຸມປຶກສາຫາລື ແລະ ຮັບຮອງເອົາແຜນຄຸ້ມຄອງໄພນ້ຳຖ້ວມແບບເຊື່ອມສານສຳລັບຕົວເມືອງຫລວງພະບາງ ແລະ 5 ຕົວເມືອງ (ເມືອງນອງ, ເມືອງຊົນບູລີ, ເມືອງເຊໂປນ, ເມືອງສອງຄອນ ແລະ ເມືອງຈໍາພອນ) ຂອງແຂວງສະຫວັນນະເຂດ
ພາຍໃຕ້ການເປັນປະທານຂອງຮອງຫົວຫນ້າກົມ, ຮອງຫົວຫນ້າພະແນກ, ຜູ້ເຂົ້າຮ່ວມ ແລະ ຊ່ຽວຊານ ໄດ້ມີການແລກປ່ຍຄໍາຄິດຄໍາເຫັນ ແລະ ປຶກສາຫາລືກ່ຽວກັບແຜນງານ ແລະ ເຫັນດີຕົກລົງຮັບຮອງເອົາແຜນງານດັ່ງກ່າວຂອງແຜນງານຕົວເມືອງຫລວງພະບາງ ແລະ 5 ຕົວເມືອງເປົ້າຫມາຍຂອງແຂວງສະຫວັນນະເຂດ ໃນ 4 ຈຸດປະສົງຫລັກເຊັ່ນ: ການປູກຈິດສຳນຶກດ້ານຄວາມຮັບຮູ້ ແລະ ຄວາມເຂົ້າໃຈກ່ຽວກັບຄວາມສ່ຽງຂອງໄພນ້ຳຖ້ວມ, ວາງແຜນການນຳໃຊ້ທີ່ດິນ, ປັບປຸງລະບົບລະບາຍນ້ຳ ແລະ ປົກປັກຮັກສາຟື້ນຟູຂອງລະບົບນິເວດໃນເຂດຕົວເມືອງເປົ້າຫມາຍໃຫ້ມີຄວາມຢືນຍົງ.