ບ້ານນາຈານໃຫຍ່ ເມືອງຊົນນະບູລີ ແຂວງສະຫວັນນະເຂດ ແມ່ນບ້ານນຶ່ງທີ່ນອນໃນເປົ້າໝາຍຂອງໂຄງການ IWRM ຫຼື ໂຄງການຄຸ້ມຄອງຊັບພະຍາກອນນ້ຳແບບເຊື່ອມສານ ແລະ ການປັບຕົວບົນພື້ນຖານລະບົບນິເວດໃນອ່າງຮັບນ້ຳເຊບັ້ງຫຽງ ແລະ ຕົວເມືອງຫຼວງພະບາງ, ຕັ້ງຢູ່ເຂດທົ່ງພຽງທີ່ມີທົ່ງຫຍ້າ, ປ່າໂຄກສະລັບສັບຊ້ອນ, ປະຊາຊົນມີມູນເຊື້ອດຸໝັ່ນໃນການຜະລິດກະສິກໍາ ເປັນຕົ້ນ: ການເຮັດນາປູກເຂົ້າ, ປູກພືດສໍາຮອງ ແລະ ລ້ຽງສັດ, ມີປ່າໄມ້ ແລະ ແຫຼ່ງນໍ້າ ຫວ້ຍ, ໜອງ, ຄອງບຶງ ທີ່ເປັນທ່າແຮງ.
ບ້ານດັ່ງກ່າວຫ່າງຈາກເທດສະບານເມືອງ ຊົນນະບູລີ ປະມານ 68 km, ມີປະຊາກອນທັງໝົດ 1,990 ຄົນ; ຍິງ 512 ຄົນ, ມີ 162 ຫຼັງຄາເຮືອນ, ມີ 256 ຄອບຄົວ ເປັນຊົນເຜົ່າກະຕ່າງກວມ 100% ປະຊາຊົນສ່ວນໃຫຍ່ຕັ້ງຖິ່ນຖານບ້ານເຮືອນຢູ່ລຽບຕາມແຄມຝັ່ງນໍ້າເຊບັ້ງຫຽງມີຄວາມສາມັກຄີປອງດອງເປັນຈິດຫນື່ງໃຈດຽວ ມີຄວາມດດຸໝັ່ນຂະຫຍັນພຽນໃນການອອກແຮງງານ.
ຄຽງຄູ່ກັບບັນດາເງື່ອນໄຂທ່າແຮງສິ່ງເອື້ອອຳນວຍດັ່ງທີ່ກ່າວມາແລ້ວນັ້ນ; ບ້ານນາຈານໃຫຍ່ຍັງມີສິ່ງທ້າທາຍບາງດ້ານທີ່ເປັນອຸປະສັກຕໍ່ການພັດທະນາເສດຖະກິດ-ສັງຄົມຂອງບ້ານ ເປັນຕົ້ນ: ເກີດໄພນ້ຳຖ້ວມເກືອບທຸກປີ ແລະ ໄພແຫ້ງແລ້ງໃນບາງປີ, ດ້ານພຶື້ນຖານໂຄງລ່າງທີ່ຮອງຮັບສິ່ງເອື້ອອຳນວຍຄວາມສະດວກຍັງບໍ່ພຽງພໍ, ເສັ້ນທາງທຽວໄດ້ແຕ່ລະດູດຽວ, ການສັນຈອນໄປ-ມາເກີດຄວາມຫຍຸ້ງຍາກໃຊ້ເວລາຈາກເມືອງໄປບໍ່ຕໍ່າກວ່າ 3 ຊົ່ວໂມງ. ແຕ່ເຖີງຢ່າງໃດກໍຕາມໃນຊ່ວງໄລຍະທີ່ຜ່ານມາທາງພາກລັດກໍຄືທຸກພາກສ່ວນຂອງເມືອງກໍໄດ້ເອົາໃຈໃສ່ລົງໃກ້ສິດຕິດແທດ ພ້ອມທັງຍາດແຍ່ງບັນຫາທຶນຮອນເຂົ້າໃນການແຂ້ໄຂປັບປຸງການເປັນຢູ່ຂອງເຂົາເຈົ້າ ເປັນຕົ້ນ: ເລັ່ງໃສ່ການຜະລິດສະບຽງອາຫານດ້ວຍການເຮັດນາແຊງ, ຊຸກຍູ້ການປູກພືດສຳຮອງ ແລະ ສ້າງສິ່ງເອື້ອອຳນວຍໃນລະດັບນຶ່ງ... ແຕ່ກໍບໍ່ທັນຕອບສະໜອງໄດ້ຕາມຄວາມຮຽງຮ້ອງຕ້ອງການເທົ່າທີ່ຄວນ.
ຕົກມາຮອດຊ່ວງປີ 2024-2025 ທາງໂຄງການ IWRN ໄດ້ເຂົ້າມາມີສ່ວນຮ່ວມໃນການພັດທະນາເປັນຕົ້ນ: ການຕອບສະໜອງນ້ຳບາດານຊຸມຊົນ 2 ບໍ່, ປ່ຽນຖ່າຍລະບົບພະລັງງານໄຟຟ້າ ມາເປັນລະບົບ ພະລັງງານແສງຕາເວັນ ເພື່ອສູບນ້ຳເຂົ້າໃນການຜະລິດລະດູແລ້ງ, ປັກຫຼັກໝາຍຂອບເຂດປ່າສະຫງວນຂອງບ້ານ, ການສະໜອງໂທລະໂຄ່ງ, ການສະໜອງເຮືອ ເພື່ອຮັບໃຊ້ໃນຍາມເກີດໄພພິບັດນ້ຳຖ້ວມ ແລະ ອື່ນໆຈໍານວນນຶ່ງ...
ທ່ານນາຍບ້ານ ເພັດຊະລາດ ຕາງໜ້າໃຫ້ແກ່ອໍານາດການປົກຄອງບ້ານ ກໍຄື ຕາງໜ້າໃຫ້ແກ່ພໍ່-ແມ່ປະຊາຊົນພາຍໃນບ້ານ ນາຈານໃຫຍ່ ເພິ່ນໄດ້ສະແດງຄວາມຄິດເຫັນຕໍ່ ພະນັກງານພວກເຮົາວ່າ:
ມີຄວາມພໍໃຈຫຼາຍທີ່ທາງພາກລັດ ກໍຄືທາງໂຄງການ ຄຸ້ມຄອງຊັບພະຍາກອນນ້ຳແບບເຊື່ອມສານ ແລະ ການປັບຕົວບົນພື້ນຖານລະບົບນິເວດ ທີ່ສະໜັບສະໜູນໂດຍ UNDP ໄດ້ເຫັນຄວາມສໍາຄັນຂອງຊາວບ້ານພວກຂ້າພະເຈົ້າ ແລະ ເຮັດໃຫ້ບ້ານນາຈານໃຫຍ່ມີໃບໜ້າໃໝ່ບໍ່ນ້ອຍໜ້າກວ່າບ້ານອື່ນ, ບ້ານພວກເຮົາມີລະບົບໄຟຟ້າແສງຕາເວັນນໍາໃຊ້ເຂົ້າໃນລະບົບຊົນລະປະທານ ແລະ ໃນທົ່ວເມືອງມີບ້ານເຮົາເປັນບ້ານທຳອິດທີ່ໄດ້ນໍາໃຊ້ລະບົບນີ້! ພິເສດ ດີໃຈທີ່ບໍ່ເສຍຄ່າໄຟຟ້າຄືປີທີ່ຜ່ານມາ...ຂອບໃຈທາງໂຄງການຫຼາຍໆເດີ ແລະ ພວກເຮົາຈະຮັກສາທຸກສິ່ງຢ່າງທີ່ທາງໂຄງການໄດ້ສະໜອງໃຫ້-ພ້ອມທັງນໍາໃຊ້ໃຫ້ເກີດປະໂຫຍດສູງສຸດ ແລະ ພວກເຮົາຊາວບ້ານນາຈານກໍ່ມີຄວາມຫວັງອີກວ່າ: ຖ້າເປັນໄປໄດ້; ໃນຊ່ວງໄລຍະທີ່ທາງໂຄງການສະໜັບສະໜູນດ້ານທຶນຮອນ ບົນພຶ້ນຖານຄວາມຢາກຂອງປະຊາຊົນ ເປົ້າໝາຍກໍ່ແມ່ນມີຄວາມຫວັງຢາກໃຫ້ບ້ານມີລະບົບສັນຍານໂທລະສັບເພື່ອສື່ສານ ແລະ ເສັ້ນທາງເຂົ້າເຖິງຈາກບ້ານ; ຈາກລໍາທວາຍ ຫາ ບ້ານນາຈານໃຫຍ່ໃຫ້ທຽວໄດ້ 2 ລະດູ... ເພາະໄລຍະທີ່ຜ່ານມາປະຊາຊົນທັງສອງບ້ານພວກຂ້າພະເຈົ້າມີຄວາມລຳບາກພົບຄວາມຫຍຸ້ງຍາກໃນການສັນຈອນໄປ-ມາໂດຍສະເພາະແມ່ນລະດູຝົນ.