ໃນລະຫວ່າງວັນທີ 19–22 ມັງກອນ 2026, ກົມຊັບພະຍາກອນນ້ຳ (ກຊນ) ຮ່ວມກັບ ອົງການ UNDP ປະຈຳ ສປປ ລາວ ແລະ ໂດຍໄດ້ຮັບການສະໜັບສະໜູນຈາກ ກອງທຶນສິ່ງແວດລ້ອມໂລກ (GEF), ໄດ້ລົງເຄື່ອນໄຫວຕິດຕາມວຽກງານພາກສະໜາມ ຢູ່ແຂວງສະຫວັນນະເຂດ ພາຍໃຕ້ ໂຄງການຄຸ້ມຄອງຊັບພະຍາກອນນ້ຳແບບເຊື່ອສານ ແລະ ການບົນພື້ນຖານລະບົບນິເວດ (IWRM–EbA). ກິດຈະກຳນີ້ແມ່ນສຸມໃສ່ການຕິດຕາມກວດກາການກໍ່ສ້າງປັບປຸງເຂດດິນບໍລິເວນນ້ຳ, ການປ້ອງກັນຕາຝັ່ງເຈື່ອນ ແລະ ຄັນຄູນກັນນ້ຳຖ້ວມ ເຊິ່ງເປັນຍຸດທະສາດທີ່ເນັ້ນການນຳໃຊ້ທຳມະຊາດ ເພື່ອຮັບມືກັບຄວາມສ່ຽງຂອງໄພນ້ຳຖ້ວມ ແລະ ໄພແຫ້ງແລ້ງ ທີ່ນັບມື້ນັບເພີ່ມທະວີຂຶ້ນໃນແຂວງດັ່ງກ່າວ.

ການປັບປຸງເຂດດິນບໍລິເວນນ້ຳ ແລະ ການປ້ອງກັນຕາຝັ່ງເຈື່ອນ ມີບົດບາດສຳຄັນໃນການບໍລິຫານຈັດການການໄຫຼຂອງນ້ຳ, ຫຼຸດຜ່ອນການເຊາະເຈື່ອນ ແລະ ເພີ່ມທະວີຄວາມສາມາດໃນການກັກເກັບນ້ຳຕາມທຳມະຊາດ ພ້ອມທັງປົກປ້ອງທີ່ຢູ່ອາໄສ, ເນື້ອທີ່ທຳການຜະລິດ ແລະ ລະບົບນິເວດທີ່ສຳຄັນ. ໃນຊຸມປີຜ່ານມາ, ປະຊາຊົນໃນເມືອງນອງ, ເມືອງເຊໂປນ ແລະ ເມືອງຊົນນະບູລີ ໄດ້ປະເຊີນກັບສິ່ງທ້າທາຍຈາກໄພນ້ຳຖ້ວມ ແລະ ໄພແຫ້ງແລ້ງທີ່ຍາວນານ ເຊິ່ງສົ່ງຜົນກະທົບຕໍ່ການດຳລົງຊີວິດ, ພື້ນຖານໂຄງລ່າງ ແລະ ຄວາມສົມດຸນຂອງລະບົບນິເວດ. ໂດຍຜ່ານການຈັດຕັ້ງປະຕິບັດວິທີການແບບ EbA, ໂຄງການ IWRM–EbA ຈະຊ່ວຍເສີມສ້າງຄວາມເຂັ້ມແຂງໃນການປັບຕົວ, ປົກປ້ອງຊຸມຊົນ ແລະ ຮັກສາໜ້າທີ່ທາງລະບົບນິເວດຂອງແມ່ນ້ຳ ແລະ ເຂດດິນບໍລິເວນນ້ຳໃຫ້ຍືນຍົງ.

ໃນລະຫວ່າງການລົງຕິດຕາມຄັ້ງນີ້, ທີມງານໂຄງການຈະໄດ້ກວດກາການກໍ່ສ້າງຢ່າງໃກ້ຊິດ ເພື່ອຮັບປະກັນໃຫ້ຖືກຕ້ອງຕາມເຕັກນິກວິຊາການ, ມາດຕະຖານຄຸນນະພາບ ແລະ ແບບແຜນຜັງທີ່ໄດ້ຮັບການອະນຸມັດ. ນອກຈາກນີ້, ຈະມີການເກັບຕົວຢ່າງດິນໃນບາງຈຸດຂອງການກໍ່ສ້າງ ເພື່ອສົ່ງວິໄຈຢູ່ຫ້ອງທົດລອງ ເພື່ອກວດກາຄວາມເໝາະສົມ ແລະ ຄວາມຫນາຫນ້ນຂອງດິນ ເພື່ອຮັບປະກັນວ່າພື້ນຖານໂຄງລ່າງເຫຼົ່ານັ້ນຈະມີຄວາມທົນທານ ແລະ ສາມາດໃຊ້ງານໄດ້ຢ່າງມີປະສິດທິພາບ ທ່າມກາງສະພາບພູມອາກາດທີ່ມີການປ່ຽນແປງ. ນອກຈາກວຽກງານເຕັກນິກແລ້ວ, ການເຄື່ອນໄຫວຄັ້ງນີ້ຍັງໃຫ້ຄວາມສຳຄັນຕໍ່ການມີສ່ວນຮ່ວມຂອງຊຸມຊົນ. ທີມງານຈະຈັດກອງປະຊຸມປຶກສາຫາລືຕາມຫຼັກການ ກັບຊຸມຊົນທີ່ໄດ້ຮັບຜົນປະໂຫຍດ ເພື່ອສ້າງຄວາມເຂົ້າໃຈກ່ຽວກັບຈຸດປະສົງ ແລະ ຜົນປະໂຫຍດຂອງໂຄງການ ພ້ອມທັງຊຸກຍູ້ໃຫ້ຊຸມຊົນເປັນເຈົ້າການໃນການປົກປັກຮັກສາ ແລະ ບູລະນະຮັກສາສິ່ງກໍ່ສ້າງເຫຼົ່ານີ້. ການປຶກສາຫາລືຍັງເປັນໂອກາດໃນການແລກປ່ຽນຄວາມຮູ້ທ້ອງຖິ່ນ ແລະ ຮັບຟັງຂໍ້ສະເໜີແນະຕ່າງໆ ເພື່ອໃຫ້ການຈັດຕັ້ງປະຕິບັດມີຄວາມສອດຄ່ອງກັບຄວາມຕ້ອງການຂອງປະຊາຊົນ.

ພ້ອມດຽວກັນນັ້ນ, ການລົງພື້ນທີ່ຍັງຈະໄດ້ກວດກາການຈັດຕັ້ງປະຕິບັດມາດຕະການປ້ອງກັນຜົນກະທົບດ້ານສິ່ງແວດລ້ອມ ແລະ ສັງຄົມ ໃຫ້ສອດຄ່ອງກັບລະບຽບການຂອງໂຄງການ ແລະ ກົດໝາຍແຫ່ງຊາດ. ການປະສານງານກັບອຳນາດການປົກຄອງທ້ອງຖິ່ນ, ວິສະວະກອນທີ່ປຶກສາ ແລະ ບໍລິສັດຜູ້ຮັບເໝົາ ຈະຊ່ວຍໃຫ້ການຄຸ້ມຄອງຄວາມສ່ຽງຕ່າງໆ ມີຄວາມທັນການ ແລະ ມີປະສິດທິພາບ.

ກິດຈະກຳນີ້ ແມ່ນໝາກຜົນຂອງຄວາມພະຍາຍາມຮ່ວມກັນລະຫວ່າງ ກົມຊັບພະຍາກອນນ້ຳ, UNDP, ອຳນາດການປົກຄອງທ້ອງຖິ່ນ ແລະ ປະຊາຊົນ. ດ້ວຍການສະໜັບສະໜູນຈາກ GEF ແລະ UNDP, ໂຄງການໄດ້ເຊື່ອມໂຍງການປົກປັກຮັກສາລະບົບນິເວດ ເຂົ້າກັບການພັດທະນາພື້ນຖານໂຄງລ່າງທີ່ທົນທານຕໍ່ສະພາບພູມອາກາດ ເພື່ອຫຼຸດຜ່ອນຄວາມສ່ຽງ, ປັບປຸງການຄຸ້ມຄອງຊັບພະຍາກອນທຳມະຊາດ ແລະ ເຮັດໃຫ້ແຂວງສະຫວັນນະເຂດມີຄວາມພ້ອມໃນການຮັບມືກັບຜົນກະທົບຈາກການປ່ຽນແປງດິນຟ້າອາກາດໃນໄລຍະຍາວ.