ແຂວງສະຫວັນນະເຂດ, ວັນທີ 2–12 ພະຈິກ 2025 – ໂຄງການຄຸ້ມຄອງຊັບພະຍາກອນນ້ຳແບບເຊື່ອມສານ ແລະ ການປັບຕົວພື້ນຖານລະບົບນິເວດ (IWRM–EbA) ໄດ້ດຳເນີນການຝຶກອົບຮົມເປັນເວລາ 10 ວັນກ່ຽວກັບເຄື່ອງມື ແລະ ເຕັກໂນໂລຊີການສື່ສານ ແລະ ການຄຸ້ມຄອງຄວາມຮູ້ໃນແຂວງສະຫວັນນະເຂດຢ່າງສຳເລັດຜົນ. ກິດຈະກຳດັ່ງກ່າວຈັດໂດຍກົມຊັບພະຍາກອນນ້ຳ (DWR), ກະຊວງກະສິກຳ ແລະ ສິ່ງແວດລ້ອມ, ໂດຍໄດ້ຮັບການສະໜັບສະໜູນຈາກ UNDP, ເຊິ່ງເປັນສ່ວນໜຶ່ງຂອງຄວາມພະຍາຍາມເພື່ອສົ່ງເສີມການສື່ສານທີ່ເປັນສູນກາງຂອງຊຸມຊົນ ແລະ ສ້າງຂີດຄວາມສາມາດໃນທ້ອງຖິ່ນສຳລັບການຄຸ້ມຄອງນ້ຳ ແລະ ລະບົບນິເວດທີ່ທົນທານຕໍ່ການປ່ຽນແປງຂອງສະພາບອາກາດ.

ການຝຶກອົບຮົມໄດ້ນຳເອົາຜູ້ເຂົ້າຮ່ວມຫຼາຍກວ່າ 80 ຄົນຈາກຫ້ອງການແຂວງ ແລະ ເມືອງ, ລວມທັງຕົວແທນຈາກຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມແຂວງສະຫວັນນະເຂດ, ເມືອງ (ນອງ, ເຊໂປນ, ຊົນນະບູລີ, ຈຳພອນ ແລະ ສອງຄອນ) ພ້ອມທັງນາຍບ້ານ ແລະ ຕົວແທນຊຸມຊົນຈາກພື້ນທີ່ເປົ້າໝາຍພາຍໃນອ່າງແມ່ນ້ຳເຊບັ້ງຫຽງ.

ຜູ້ເຂົ້າຮ່ວມໄດ້ມີສ່ວນຮ່ວມໃນຝຶກປະຕິບັດຕົວຈິງ ແລະ ການຮຽນຮູ້ໂດຍສຸມໃສ່ການນຳໃຊ້ແອັບພລິເຄຊັນໂທລະສັບມືຖື 📱, ວິທະຍຸຊຸມຊົນ 📻, ແລະ ເວທີສື່ສັງຄົມອອນລາຍ 💬 ເພື່ອປັບປຸງການສື່ສານ ແລະ ການຕັດສິນໃຈໃນການຄຸ້ມຄອງຊັບພະຍາກອນທຳມະຊາດ. ເຄື່ອງມືເຫຼົ່ານີ້ຖືກອອກແບບມາເພື່ອເຮັດໃຫ້ການສົ່ງການສື່ສານວ່ອງໄວຂຶ້ນໂດຍສະເພາະແມ່ນຂໍ້ມູນສະພາບອາກາດ ແລະ ສິ່ງແວດລ້ອມ ລະຫວ່າງອຳນາດການປົກຄອງທ້ອງຖິ່ນ ແລະ ຊຸມຊົນ, ປັບປຸງລະບົບເຕືອນໄພລ່ວງໜ້າ ⚠️ ແລະ ຊຸກຍູ້ການຮ່ວມມືຢ່າງຕັ້ງໜ້າເພື່ອແກ້ໄຂບັນຫາທີ່ກ່ຽວຂ້ອງກັບນ້ຳເຊັ່ນ: ໄພນ້ຳຖ້ວມ ແລະ ໄພແຫ້ງແລ້ງ.

ຕະຫຼອດການຝຶກອົບຮົມ, ຜູ້ເຂົ້າຮ່ວມໄດ້:
✅ ໄດ້ຮັບປະສົບການຕົວຈິງໃນການນຳໃຊ້ເຄື່ອງມືການສື່ສານດິຈິຕອນ ແລະ ແບເກົ່າ ເພື່ອເສີມສ້າງການປະສານງານລະຫວ່າງເມືອງ ແລະ ບ້ານ
✅ ໄດ້ຮຽນຮູ້ວິທີການສ້າງຕັ້ງ ເວທີແລກປ່ຽນຄວາມຮູ້ ທີ່ອີງໃສ່ຊຸມຊົນ ເພື່ອປັບປຸງຄວາມຮັບຮູ້ ແລະ ການຕັດສິນໃຈໃນທ້ອງຖິ່ນ
✅ ໄດ້ປຶກສາຫາລືກ່ຽວກັບ ຍຸດທະສາດ ໃນການເຊື່ອມໂຍງລະບົບການສື່ສານ ແລະ ການຄຸ້ມຄອງຄວາມຮູ້ ເຂົ້າໃນຂະບວນການວາງແຜນ, ຕິດຕາມ, ແລະ ການຮັບມືກັບສະຖານະການຕ່າງໆ ໃນລະດັບເມືອງ.

ກິດຈະກຳດັ່ງກ່າວຍັງລວມມີການສົນທະນາກຸ່ມ, ການຝຶກຊ້ອມພາກສະໜາມ ແລະ ການປະເມີນຄວາມຮັບຮູ້ຂອງຊຸມຊົນກ່ຽວກັບການຄຸ້ມຄອງຊັບພະຍາກອນນ້ຳແບບເຊື່ອມສານ (IWRM) ແລະ ການປັບຕົວບົນພື້ນຖານລະບົບນິເວດ (EbA). ຜູ້ເຂົ້າຮ່ວມໄດ້ ແລກປ່ຽນປະສົບການທ້ອງຖິ່ນ, ລະບຸຊ່ອງວ່າງທາງດ້ານຄວາມຮູ້ ທີ່ຍັງຂາດ ແລະ ສ້າງຄຳແນະນຳ ເພື່ອເພີ່ມປະສິດທິພາບຂອງເຄືອຂ່າຍການສື່ສານໃນການຄຸ້ມຄອງຊັບພະຍາກອນ.

“ການຝຶກອົບຮົມນີ້ໄດ້ສະໜອງທັກສະທີ່ມີຄຸນຄ່າສຳລັບອຳນາດການປົກຄອງທ້ອງຖິ່ນ ແລະ ຊຸມຊົນ,” ຕົວແທນຈາກກົມຊັບພະຍາກອນນ້ຳກ່າວ. "ໂດຍການປັບປຸງການສື່ສານ ແລະ ການແລກປ່ຽນຄວາມຮູ້, ພວກເຮົາກຳລັງສ້າງຄວາມເຂັ້ມແຂງໃຫ້ປະຊາຊົນໃນການຕັດສິນໃຈທີ່ທັນເວລາ ແລະ ມີຂໍ້ມູນຄົບຖ້ວນ ເຊິ່ງປົກປ້ອງພື້ນທີ່ຕົ້ນນ້ຳ, ຫຼຸດຜ່ອນຄວາມສ່ຽງ ແລະ ສ້າງຄວາມທົນທານຕໍ່ກັບໄພນ້ຳຖ້ວມ ແລະ ໄພແຫ້ງແລ້ງ."

ການຝຶກອົບຮົມແມ່ນສ່ວນໜຶ່ງທີ່ສຳຄັນຂອງໂຄງການ IWRM–EbA ທີ່ຈັດຕັ້ງປະຕິບັດຢູ່ໃນອ່າງແມ່ນ້ຳເຊບັງຫຽງ ແລະ ຕົວເມືອງຫຼວງພະບາງ, ເຊິ່ງມີຈຸດປະສົງເພື່ອເສີມຂະຫຍາຍຄວາມທົນທານຕໍ່ສະພາບອາກາດໂດຍຜ່ານການຄຸ້ມຄອງຊັບພະຍາກອນນ້ຳ, ປ່າໄມ້ ແລະ ທີ່ດິນແບບຍືນຍົງ. ໂດຍໄດ້ຮັບການສະໜັບສະໜູນຈາກ UNDP, ໂຄງການດັ່ງກ່າວລວມເອົາວິທີການທີ່ອີງໃສ່ລະບົບນິເວດ ແລະ ເຄື່ອງມືໃໝ່ໆເພື່ອເສີມສ້າງຄວາມສາມາດໃນການປັບຕົວໃນລະດັບຊຸມຊົນ.

ໃນຕອນທ້າຍຂອງກິດຈະກຳ 10 ມື້, ອຳນາດການປົກຄອງທ້ອງຖິ່ນ ແລະ ຕົວແທນຊຸມຊົນໄດ້ສະແດງຄວາມມຸ່ງໝັ້ນຢ່າງແຮງກ້າໃນການນຳໃຊ້ເຄື່ອງມືການສື່ສານໃໝ່ ແລະ ຮັກສາຊ່ອງທາງການແລກປ່ຽນຄວາມຮູ້ຢ່າງຫ້າວຫັນໃນທົ່ວເມືອງຕ່າງໆ. ນີ້ໝາຍເຖິງບາດກ້າວທີ່ສຳຄັນໄປສູ່ການຄຸ້ມຄອງນ້ຳແບບມີສ່ວນຮ່ວມ, ມີປະສິດທິພາບດ້ານເຕັກໂນໂລຢີ ແລະ ທົນທານຕໍ່ສະພາບອາກາດໃນ ສປປ ລາວ.

Contact for Further Information:
For media inquiries, please contact:
Phouphet Chittaphone, Database and Communication Officer, IWRM-EbA Project
Department of Water Resources, Ministry of Agriculture and Environment
Email: [email protected] Tel: +8562058562532