ກົມຊັບພະຍາກອນນ້ຳ, ກະຊວງກະ​ສິ​ກຳ ແລະ ສິ່ງ​ແວດ​ລ້ອມ, ຮ່ວມກັບ ສູນພາກພື້ນຣາມຊາ ອາ​ຊີຕາເວັນອອກ (RRC-EA) ແລະ ໂດຍການສະໜັບສະໜູນຈາກ ອົງການ ສປຊ ເພື່ອການພັດທະນາ (UNDP), ຈັດກອງປະຊຸມຝຶກອົບຮົມລະດັບຊາດ ກ່ຽວກັບການຄຸ້ມຄອງພື້ນ​ທີ່​ດິນ​ບໍ​ລິ​ເວນ​ນ້ຳ ໂດຍອີງໃສ່ການປັບຕົວເຂົ້າກັບການປ່ຽນແປງສະພາບພູມອາກາດ ໂດຍອີງໃສ່ລະບົບນິເວດ (EbA) ຂຶ້ນທີ່ແຂວງສະຫວັນນະເຂດ ໃນລະຫວ່າງວັນທີ 10-12 ກັນຍາ 2025.

ການຝຶກອົບຮົມຄັ້ງນີ້ ແມ່ນສ່ວນໜຶ່ງຂອງໂຄງການຄຸ້ມຄອງຊັບພະຍາກອນນ້ຳແບບ​ເຊື່ອມ​ສານ ແລະ ການປັບຕົວ​ບົນ​ພື້ນ​ຖານລະບົບນິເວດ (IWRM-EbA) ຢູ່ເຂດອ່າງຮັບນ້ຳເຊບັ້ງຫຽງ ແລະ ຕົວ​ເມືອງຫຼວງພະບາງ, ເຊິ່ງໄດ້ຮັບທຶນສະໜັບສະໜູນຈາກ ກອງທຶນສຳລັບປະເທດດ້ອຍພັດທະນາ (LDCF) ພາຍໃຕ້ການຄຸ້ມຄອງຂອງ UNDP ແລະ GEF. ໂຄງການດັ່ງກ່າວມີໄລຍະເວລາຈັດຕັ້ງປະຕິບັດແຕ່ປີ 2022 ຫາ 2026, ເພື່ອຊ່ວຍເຫຼືອລັດຖະບານ ສປປ ລາວ ໃນການສ້າງຄວາມເຂັ້ມແຂງໃຫ້ແກ່ຊຸມຊົນທີ່ອ່ອນໄຫວຕໍ່ໄພນ້ຳຖ້ວມ ແລະ ໄພແຫ້ງແລ້ງ ໂດຍຜ່ານວິທີການແກ້ໄຂບັນຫາທີ່ອີງໃສ່ລະບົບນິເວດ ທີ່ປະສົມປະສານລະຫວ່າງການຄຸ້ມຄອງຊັບພະຍາກອນນ້ຳ ແລະ ການອະນຸລັກຊີວະນາໆພັນ.

ຄາດວ່າມີຜູ້ເຂົ້າຮ່ວມຫຼາຍກວ່າ 50 ທ່ານ, ລວມມີ ຜູ້ຄ​ຸ້ມ​ຄອງ​ດິນ​ບໍ​ລິ​ເວນ​ນ້ຳ, ພະນັກງານພາກສະໜາມ, ພະນັກງານຈາກພະແນກ​ກະ​ສິ​ກຳ ແລະ ສິ່ງແວດລ້ອມ ແຂວງ ແລະ ເມືອງ, ນັກວິໄຈຈາກມະຫາວິທະຍາໄລສຸພານຸວົງ ແລະ ຜູ້ຕາງໜ້າຈາກພາກສ່ວນຮ່ວມງານດ້ານການອະນຸລັກ ເຊັ່ນ: ອົງການອະນຸລັກທຳມະຊາດສາກົນ (IUCN), ອົງການອະນຸລັກສັດປ່າ (WCS), ສະຖາບັນຄຸ້ມຄອງນ້ຳສາກົນ (IWMI) ແລະ ອົງການ UNDP.

ການຝຶກອົບຮົມຈະປະກອບມີ ພາກວິຊາການກ່ຽວກັບການກຳນົດເຂດຣາມຊາ (Ramsar Site) ແລະ ການວາງແຜນຄຸ້ມຄອງພື້ນ​ທີ່​ດິນ​ບໍ​ລິ​ເວນ​ນ້ຳ, ການນຳສະເໜີບົດຮຽນຈາກແຂວງອັດຕະປື ແລະ ແຂວງຈຳປາສັກ, ພ້ອມທັງການສົນທະນາແລກປ່ຽນບົດຮຽນກ່ຽວກັບການລິເລີ່ມຄຸ້ມຄອງພື້ນ​ທີ່​ດິນ​ບໍ​ລິ​ເວນ​ນ້ຳໂດຍຊຸມຊົນ. ຈຸດເດັ່ນຂອງວາລະແມ່ນການລົງພາກສະໜາມຢູ່ເຂດຣາມຊາເຊຈຳພອນ ເມືອງຈຳພອນ, ເພື່ອໃຫ້ຜູ້ເຂົ້າຮ່ວມໄດ້ຝຶກນຳໃຊ້ເຄື່ອງມືຕິດຕາມກວດກາ ເຊັ່ນ: ການປະເມີນລະບົບນິເວດພື້ນ​ທີ່​ດິນ​ບໍ​ລິ​ເວນ​ນ້ຳແບບໄວ (RAWES), ເຄື່ອງມືຕິດຕາມປະສິດທິພາບການຄຸ້ມຄອງເຂດຣາມຊາ (R-METT) ແລະ ເຄື່ອງມືປະເມີນຄວາມອ່ອນໄຫວຂອງພື້ນ​ທີ່​ດິນ​ບໍ​ລິ​ເວນ​ນ້ຳ (WETVAT).

ບັນດາຜູ້ຊ່ຽວຊານຈາກໂຄງການ IWRM-EbA ຈະມີບົດບາດສຳຄັນໃນການຝຶກອົບຮົມຄັ້ງນີ້, ໂດຍ ທ່ານ Dr. Deependra Joshi, ທີ່ປຶກສາທາງດ້ານເຕັກນິກອາວຸໂສ ຈະນຳສະເໜີບົດຮຽນກ່ຽວກັບການເຊື່ອມໂຍງການຄຸ້ມຄອງນ້ຳ ແລະ ພື້ນ​ທີ່​ດິນ​ບໍ​ລິ​ເວນ​ນ້ຳໃນອ່າງຮັບນ້ຳເຊບັ້ງຫຽງ, ໃນຂະນະທີ່ ທ່ານ ພິ້ງສະຫຼຽວ ສີທ່ຽງທຳ, ຜູ້ປະສານງານໂຄງການ ຈະເປັນຜູ້ນຳພາການຝຶກປະຕິບັດເຕັກນິກການນຳໃຊ້ວິທີການ RAWES ທັງໃນຫ້ອງຝຶກອົບຮົມ ແລະ ພາກສະໜາມ. ການມີສ່ວນຮ່ວມສະແດງໃຫ້ເຫັນເຖິງການປະກອບສ່ວນອັນສຳຄັນຂອງໂຄງການ ໃນການຊຸກຍູ້ການຄຸ້ມຄອງພື້ນ​ທີ່​ດິນ​ບໍ​ລິ​ເວນ​ນ້ຳໂດຍອີງໃສ່ລະບົບນິເວດໃນ ສປປ ລາວ.

ທ່ານ ສິງທອງ ພັນທະມາລາ, ຫົວໜ້າພະແນກຄຸ້ມຄອງອ່າງຮັບນ້ຳ ແລະ ວາງແຜນພັດທະນາ, ກົມຊັບພະຍາກອນນ້ຳ ໄດ້ກ່າວວ່າ: “ການຝຶກອົບຮົມຄັ້ງນີ້ ຈະຊ່ວຍຍົກສູງການອະນຸລັກ ແລະ ຄຸ້ມຄອງພື້ນ​ທີ່​ດິນ​ບໍ​ລິ​ເວນ​ນ້ຳໃນ ສປປ ລາວ ພ້ອມທັງສົ່ງເສີມຄວາມເຂັ້ມແຂງຂອງຊຸມຊົນຕໍ່ຜົນກະທົບຈາກການປ່ຽນແປງສະພາບພູມອາກາດ. ຜ່ານການສ້າງຂີດຄວາມສາມາດທາງດ້ານເຕັກນິກ ແລະ ການສົ່ງເສີມການຮ່ວມມື, ພວກເຮົາກຳລັງສ້າງເຄືອຂ່າຍຜູ້ຄຸ້ມຄອງພື້ນ​ທີ່​ດິນ​ບໍ​ລິ​ເວນ​ນ້ຳທີ່ເຂັ້ມແຂງ ເພື່ອປົກປັກຮັກສາລະບົບນິເວດທີ່ສຳຄັນເຫຼົ່ານີ້.”

ພື້ນ​ທີ່​ດິນ​ບໍ​ລິ​ເວນ​ນ້ຳ ເຊັ່ນ ເຂດຣາມຊາເຊຈຳພອນ ມີຄວາມສຳຄັນຢ່າງຍິ່ງໃນການຄວບຄຸມລະບົບນ້ຳ, ການຮັກສາຊີວະນາໆພັນ ແລະ ການສ້າງລາຍຮັບໃຫ້ແກ່ຊຸມຊົນໃນເຂດຊົນນະບົດ. ເຖິງຢ່າງໃດກໍຕາມ, ແຮງກົດດັນຈາກການຂະຫຍາຍຕົວຂອງຂະແໜງກະສິກຳ, ການກາຍເປັນຕົວເມືອງ ແລະ ການປ່ຽນແປງສະພາບພູມອາກາດ ໄດ້ເຮັດໃຫ້ການຄຸ້ມຄອງແບບຍືນຍົງມີຄວາມຈຳເປັນຮີບດ່ວນກວ່າທີ່ເຄີຍ. ການຝຶກອົບຮົມຄັ້ງນີ້ ໄດ້ສືບຕໍ່ຜົນສຳເລັດຈາກກິດຈະກຳຕ່າງໆຂອງໂຄງການ IWRM-EbA ຜ່ານມາ ຢູ່ແຂວງສະຫວັນນະເຂດ ແລະ ຫຼວງພະບາງ ແລະ ທັງສ່ອງແສງໃຫ້ເຫັນເຖິງຄວາມມຸ່ງໝັ້ນຂອງລັດຖະບານ ຕໍ່ກັບການຄຸ້ມຄອງຊັບພະຍາກອນນ້ຳແບບເຊື່ອມ​ສານ ແລະ ການນຳໃຊ້ວິທີການແກ້ໄຂບັນຫາທີ່ອີງໃສ່ທຳມະຊາດ. ນອກຈາກນີ້, ຍັງເປັນການເສີມສ້າງບົດບາດຂອງ ສປປ ລາວ ໃນການຈັດຕັ້ງປະຕິບັດວັດຖຸປະສົງຂອງສົນທິສັນຍາຣາມຊາ ວ່າດ້ວຍພື້ນ​ທີ່​ດິນ​ບໍ​ລິ​ເວນ​ນ້ຳ ທີ່ ສປປ ລາວ ໄດ້ເຂົ້າເປັນພາຄີມາແຕ່ປີ 2010.

ຕະຫຼອດໄລຍະ 4 ທົດສະວັດທີ່ຜ່ານມາ, ອົງການ UNDP ໄດ້ຮ່ວມມືກັບລັດຖະບານ ສປປ ລາວ ໃນການແກ້ໄຂບັນຫາການປ່ຽນແປງສະພາບພູມອາກາດ, ການຫຼຸດຜ່ອນຄວາມສ່ຽງຈາກໄພພິບັດ, ການປົກປັກຮັກສາຊີວະນາໆພັນ ແລະ ສົ່ງເສີມການພັດທະນາແບບຍືນຍົງທີ່ທຸກພາກສ່ວນມີສ່ວນຮ່ວມ. ການຝຶກອົບຮົມໃນຄັ້ງນີ້ ແມ່ນສ່ວນໜຶ່ງຂອງການຮ່ວມມືຢ່າງຕໍ່ເນື່ອງ ເພື່ອຮັບປະກັນໃຫ້ຊຸມຊົນທ້ອງຖິ່ນ ແລະ ລະບົບນິເວດ ມີຄວາມພ້ອມທີ່ດີກວ່າເກົ່າໃນການຮັບມືກັບສິ່ງທ້າທາຍຈາກການປ່ຽນແປງສະພາບພູມອາກາດ.