ເນື່ອງໃນໂອກາດ ວັນນ້ຳໂລກ ປະຈຳປີ 2025, ພວກເຮົາມາຮ່ວມກັນສະເຫຼີມສະຫຼອງຜົນສຳເລັດໃນລະດັບສາກົນ ຂອງການສະໜອງນ້ຳສະອາດໃຫ້ແກ່ຊຸມຊົນຕ່າງໆ, ໂດຍສະເພາະແມ່ນຊຸມຊົນທີ່ອາໄສຢູ່ໃນເຂດຫ່າງໄກສອກຫຼີກ. ສຳລັບຫຼາຍຄອບຄົວໃນທົ່ວໂລກ, ນ້ຳສະອາດແມ່ນຊັບພະຍາກອນທີ່ມີຄວາມໝາຍສຳຄັນທີ່ສຸດຕໍ່ກັບການບໍລິໂພກ ແລະ ອຸປະໂພກ, ທັງເປັນປັດໄຈພື້ນຖານທີ່ຂາດບໍ່ໄດ້ໃນການຮັກສາສຸຂະພາບ ແລະ ສ້າງເສີມສຸຂະພາວະທີ່ດີ.

ສຳລັບ ສປປ ລາວ, ການເຂົ້າເຖິງແຫຼ່ງນ້ຳຍັງຄົງເປັນສິ່ງທ້າທາຍທີ່ສຳຄັນສຳລັບຫຼາຍຄົວເຮືອນ, ໂຮງຮຽນ, ສະຖານທີ່ເຮັດວຽກ ແລະ ເຂດການຜະລິດກະສິກຳ. ປະເທດລາວໄດ້ໃຫ້ຄຳໝັ້ນສັນຍາຢ່າງໜັກແໜ້ນ ໃນການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ (SDGs) ຮອດປີ 2030, ໂດຍສະເພາະແມ່ນການຮັບປະກັນໃຫ້ທຸກຄົນສາມາດເຂົ້າເຖິງນ້ຳສະອາດ ແລະ ສຸຂະອະນາໄມທີ່ດີ. ເຖິງຢ່າງໃດກໍຕາມ, ແມ້ວ່າມີຄວາມພະຍາຍາມຢ່າງຕໍ່ເນື່ອງ, ແຕ່ປະຊາຊົນຈຳນວນຫຼາຍຍັງຄົງດຳລົງຊີວິດໂດຍຂາດແຫຼ່ງນ້ຳທີ່ປອດໄພ ແລະ ເຊື່ອຖືໄດ້. ດ້ວຍການສະໜັບສະໜູນອັນລ້ຳຄ່າຈາກ ກອງທຶນສິ່ງແວດລ້ອມໂລກ (GEF) ແລະ ອົງການ ສປຊ ເພື່ອການພັດທະນາ (UNDP), ຄວາມຄືບໜ້າທີ່ສຳຄັນແມ່ນກຳລັງເກີດຂຶ້ນຢູ່ແຂວງສະຫວັນນະເຂດ ເຊິ່ງເປັນໜຶ່ງໃນເຂດທີ່ປະເຊີນກັບບັນຫາການຂາດແຄນນ້ຳ. ການຕິດ​ຕັ້ງນ້ຳບາດານ ແລະ ການຕິດຕັ້ງລະບົບຈັກສູບນ້ຳພະລັງງານແສງອາທິດ ຢູ່ຕາມໂຮງຮຽນ ແລະ ຊຸມຊົນ ໄດ້ນຳເອົານ້ຳສະອາດໄປສູ່ໝູ່ບ້ານໃນເຂດຊົນນະບົດ. ການລິເລີ່ມດັ່ງກ່າວ ບໍ່ພຽງແຕ່ຊ່ວຍຍົກສູງຄຸນນະພາບຊີວິດຂອງປະຊາຊົນທ້ອງຖິ່ນເທົ່ານັ້ນ, ແຕ່ຍັງເປັນການສະໜັບສະໜູນວຽກງານສ້າງຄວາມເຂັ້ມແຂງເພື່ອຮັບມືກັບໄພນ້ຳຖ້ວມ ແລະ ໄພແຫ້ງແລ້ງ ໂດຍການສະໜອງແຫຼ່ງນ້ຳທີ່ຍືນຍົງ ແລະ ໝັ້ນຄົງ.

ຄວາມພະຍາຍາມເຫຼົ່ານີ້ ແມ່ນສອດຄ່ອງກັບເປົ້າໝາຍລວມທີ່ວ່າ "ຈະບໍ່ຖິ້ມໃຜໄວ້ທາງຫຼັງ", ດັ່ງທີ່ໄດ້ກຳນົດໄວ້ໃນ ວາລະການພັດທະນາແບບຍືນຍົງ 2030. ການຈັດຕັ້ງປະຕິບັດວິທີການແກ້ໄຂບັນຫາການເຂົ້າເຖິງນ້ຳແບບເຊື່ອມ​ສານ ແມ່ນການປະກອບສ່ວນເຂົ້າໃນການສ້າງອະນາຄົດທີ່ເຂັ້ມແຂງໃຫ້ແກ່ຊຸມຊົນໃນ ສປປ ລາວ ແລະ ໃນທົ່ວໂລກ. ເນື່ອງໃນໂອກາດ ວັນນ້ຳໂລກ ປະຈຳປີ 2025 ນີ້, ໃຫ້ພວກເຮົາຮ່ວມກັນທົບທວນເຖິງຄວາມສຳຄັນຂອງນ້ຳໃນຊີວິດປະຈຳວັນ ແລະ ພ້ອມກັນສະໜັບສະໜູນບັນດາກິດຈະກຳທີ່ແນໃສ່ການສະໜອງນ້ຳທີ່ສະອາດ ແລະ ປອດໄພ ໃຫ້ແກ່ທຸກຄົນ, ໃນທຸກຫົນແຫ່ງ. 💧